Libro + CD + DVD
A compañía discográfica Sons Galiza pon no mercado o proxecto XOSÉ MARÍA ÁLVAREZ BLÁZQUEZ, ENTRE O MIÑO E O MAR DE VIGO, en edición LIBRO-CD-DVD.
Este traballo multimedia é o número dous da colección O SON DA PALABRA.
A colección comezou co volume MARIA MARIÑO,PALABRA NO TEMPO QUE COMENZA e naceu para publicar textos literarios musicados nos que se inclúen documentais biográficos dos creadores.
A entrega en torno á vida e obra do escritor tudense componse dos seguintes formatos: un CD que baixo o título xenérico de “COLORÍN” contén 11 temas doutros tantos poemas do libro de poemas infantís ROSEIRA DO TEU MENCER, dedicado por XOSÉ MARÍA á súa filla María Luísa, coñecida familiarmente por “Colorín”; un DVD dunha hora de duración no que se narra a biografía de ÁLVAREZ BLÁZQUEZ dende o seu nacemento en Tui, ata a súa marcha a Vigo pasando polo seu desterro en Coreses (Zamora) ou o tempo que pasou na cidade asturiana de Oviedo.
No documental interveñen diferentes membros da familia Álvarez Blázquez: a súa dona María Luísa Cáccamo, as súas fillas, Elena e Berta, os fillos Xosé María, Alfonso e Celso. Tamén interveñen os seus sobriños Dario e Alfonso Álvarez Gándara e un abano de amigos que coñeceron a este activista da cultura como son entre outros: Dario Xohan Cabana, Luís Ferreiro, Francisco F. Del Riego, Víctor F.Freixanes, María do Carme Krukenberg, Marga Romero, Rafael Sánchez, Lalo Vázquez Gil, etc.
Esta publicación está pensada para dar a coñecer o inxente labor que fixo a prol da cultura galega este egrexio persoeiro e ao tempo para que sirva como material para a docencia.
Os poemas musicados son obra de Eloi Caldeiro igual que a dirección do documental.
Na actualidade, o grupo de músicos que fixo a gravación dos temas está a ensaiar para levar a diferentes partes do país concertos de música infantil durante o mes de maio co gallo de dedicarlle o día das Letras Galegas a Xosé María Álvarez Blázquez.
- Durme nenniña
- A frol
- No rego do prado
- Polo laranxal
- Nena neniña
- Arco da vella
- O año pitaño
- Era una airiño soave
- Ai! Nena
- Voa Maruxiña
- Colorín
